काठमाडौं, १३ पुस । सदभावना पार्टीका अध्यक्ष राजेन्द्र महतो कुटिएको घटनालाई भारतले प्राथमिकताका साथ हेरेको छ ।
यो घटनालाई भारतीय मिडियाले पनि प्राथमिकता दिएका छन् । आफ्नै सहयोगमा आन्दोलन र नाकाबन्दी गरिरहेका महतो नै आक्रमणमा परेपछि भारतले चिन्ता जनाएको भारतीय मिडियाले लेखेका छन् ।
भारतीय पत्रिका दैनिक जागरणले महतो कुटिएको घटनालाई प्राथमिकताका साथ प्रकाशित गर्दै प्रहरीले हस्तक्षेप गरेर गोली चलाएको आरोप लगाएको छ । उसले प्रहरीको लाठीबाट सदभावना अध्यक्ष महतोको टाउको र छातिमा चोट लागेको लेखेको छ ।
महतोमाथि प्रहरीले गरेको कारवाहीको विरोधमा मधेसका कैयौ स्थानमा प्रदर्शन भएको उसले लेखेको छ । अन्य १२ प्रदर्शनकारी घाइते भएको पनि समाचारमा उल्लेख छ ।
त्यसैगरी अर्काे पत्रिका अमर उजालाले पनि महतोको समाचारलाई प्राथमिकताका साथ छापेको छ । उसले भनेको छ प्रहरीको आक्रमणमा महतो घाइते भएका छन् । मधेसमा आन्दोलन झन चर्किएको छ ।
महतो कुटिएपछि हिजो मात्रै लालु यादवको पार्टीका वरिष्ठ उपाध्यक्ष एवं पूर्व केन्द्रीय मन्त्री रघुवंश प्रसाद सिंहले घटनाप्रति दुःख व्यक्त गर्दै मधेसका माग पुरा गराउन नेपाल सरकारलाई दबाब दिने बताएका थिए ।
उनले मधेसलाई नेपालले हेपेको आरोप लगाउँदै अधिकार प्राप्तिको आन्दोलनमा भारत सरकारले दबाब दिनुपर्ने बताए । यसैगरी आइतबार विराटनगर पुगेर एमाओवादी अध्यक्ष प्रचण्डले पनि घटनाप्रति दुःख व्यक्त गर्दै महतोको स्वास्थ्यलाभको कामना गरेका थिए ।
मधेसमा चार महिनादेखि आन्दोलन गरिरहेको मधेसी मोर्चाले भारतकै सहयोगमा आन्दोलन गरेको बताउँदै आएको छ । शनिबार विराटनगरको जोगवनी नाकामा झडप हुँदा महतो घाइते भएका थिए । उनको उपचार भइरहेको छ ।
राजधानीमा वार्ता भइरहेका महतो एक्कासी वीरगञ्जबाट नाका अवरोध गर्न जोगवनी पुग्दा यो घटना भएको हो । कतिपयले यसलाई वार्ता भाँड्ने षडयन्त्र पनि भनेका छन् ।
dainiknepal
