नाकाबन्दी नखोलेसम्म भारत नजाने अडान
काठमाडौं । केही दिनमा राजनीतिक बदलाव नभए प्रधानमन्त्री केपी शर्मा ओली चीन भ्रमणमा जाने पक्का भएको छ ।
भारतीय नाकाबन्दी पूर्ण रुपमा नखुलेसम्म भारत नजाने अडान राखेका ओलीलाई चीनले न्यानो सत्कार गर्ने सन्देश दिइसकेको छ र त्यसकै तयारीका लागि उपप्रधानमन्त्री कमल थापा यतीबेला चीनमा छन् ।
चीनसँग हुने भनिएको इन्धन व्यापार सम्झौता, विप्पा, पारवहन लगायतका सम्झौता ओलीकै उपस्थितिमा गर्ने चिनियाँ चाहनाले पनि निकट भविष्यमै उनको उत्तर यात्रा हुने संकेत मिलेको हो ।
ओलीले यस बारेमा आफ्ना निकटहरुसँग सल्लाह समेत गरिसकेका छन् । उनले अब चीनसँगको वाणिज्य व्यवस्थालाई मजबुद बनाउनेगरी सम्झौताका लागि जाने तयारी गरेका हुन् ।
भारतले नाकाबन्दी खोल्न आनाकानी गरेर आफ्नो सरकारलाई कमजोर पार्ने षड्यन्त्र गरिरहेको बुझेका उनले भारतसँग झुकेर हैन चीनसँग मिलेर अघि बढ्ने संकेत गरेका हुन् ।
उनले जनवरीको दोस्रो साता चीन जाने तयारी गरेको बालुवाटार स्रोत बताउँछ । चीनमै रहेका ओलीका निकट पात्र कानुन मन्त्री अग्नी खरेलले पनि यस्तै अभिव्यक्ति दिएका छन् ।
प्रधानमन्त्री ओलीकै उपस्थितिमा हुने सम्झौताले मात्रै नेपालले चीनसँग इन्धन ल्याउने वातावरण बन्ने भएको छ । चीनले कर रहित इन्धन दिने तयारी समेत गरेको छ र उच्च राजनीतिक प्रतिवद्धता खोजेको चीनले ओलीलाई पहिला बोलाउने र फेब्रवरी वा मार्चमा चिनियाँ प्रधानमन्त्री या उपराष्ट्रपतिलाई नेपाल पठाउने तयारी समेत गरेको बताइन्छ ।
ओलीको यो भ्रमणले राजनीतिक रुपमा पनि भारतलाई चुनौति दिएको मानिने छ । उर्जा विकासका लागि चीनसँग सहकार्य गर्ने र भारतलाई विजुली बेच्ने योजना नेपालको छ ।
यसका लागि प्रधानमन्त्रीको भ्रमण नै आवश्यक देखिएको छ । भारतले गफ मात्र दिने र काम नगर्ने गरेका कारण पनि चिनियाँ लगानी नेपाल भित्राएर जलविद्युत्मा केही वर्ष भिनै निर्यातमुखी बनाउने योजना सरकारको छ ।
ओलीको चीन भ्रमण भारतीय प्रधानमन्त्री मोदीका लागि राजनीतिक रुपमा हार मात्र हुने छैन, उनले विश्वभर देखाइरहेको फुर्ती पनि कम हुने छ । किनकी विश्वभर जतीनै कुर्लीदै दौडिए पनि छिमेकीलाई रुष्ट पार्नु उनका लागि महंगो सावित हुदै छ ।
तर, मोदीले विभिन्न च्यानल मार्फत् ओलीलाई पहिला भारत आउन आग्रह गरिरहेका छन् । उनले भारत आएर आफुसँगको भेट पछि सबै विषय स्वत सहज बन्ने र दुई देश बिचमा देखिएको विवाद र बढेको दुरी पनि ओली भ्रमणले सहज हुने बताउनु थालेका छन् ।
यतीसम्म की ओलीले दिल्ली दरबारमा टेके आफू पवित्र हुने किसिमले उनले सन्देशहरु मात्र पठाएका छैनन्, चीनसँग व्यापार गर्दा महंगो पर्ने भन्दै त्यता नलाग्न आग्रह समेत गरिरहेको स्रोत बताउँछ ।
भारतकै व्यापारीहरुको चर्को विरोधपछि मोदी नरम बनेका हुन् भने ओलीको अडानका सामु उनले घुँडा टेक्ने बाटो पनि खोजिरहेका छन् ।
nepalsandesh
