काठमाडौं । तीन ठूला दलका नेताहरूले भारतप्रति नतमस्तक रहेर आत्मसमर्पण गर्ने गरेको भन्ने आरोप लगाएर नथाक्ने पात्र, उपप्रधानमन्त्री कमल थापाले दिल्लीमा गएर भारतीय शासकसँग गोप्य सम्झौता गरेको आशंका यसबेला ब्याप्त छ । त्यसैकारण पनि मधेशी मोर्चासँग वार्ता मिल्ने भने भन्दै बालुवाटारमा हर्ष छाएको थियो ।
मोर्चाका माग पुरा नभए पनि दिल्ली भ्रमणको बेला उपप्रधानमन्त्री थापाले केही गोप्य सम्झौता गरेको र यसले नेपाली स्वाधीनतामाथि आँच आएको भन्ने आशंका बढेको छ । भारतीय अधिकारीहरुले मधेस आन्दोलनसँग भारतलाई जोड्दै नेपाल सरकारले भारतबिरुद्ध गरेको प्रचारबाजीका बिषयमा थापासँग स्पष्टिकरण लिएको रहस्य खुलेको छ ।
संयुक्त मधेशी मोर्चाका नेताहरुसँग शुक्रबार साँंझ काठमाडौंस्थित दूतावासमा भएको भेटमा भारतीय राजदूत रंजीत रेले यसको खुलासा गरेका हुन् । राजदूत रेसँग शुक्रबार साँंझ तराई मधेस लोकतान्त्रिक पार्टीका अध्यक्ष महन्थ ठाकुर, सद्भावना पार्टीका सहअध्यक्ष लक्ष्मणलाल कर्ण र तराई मधेस सद्भावना पार्टीका उपाध्यक्ष रामनरेश रायले लामो परामर्श गरेका थिए । स्रोतका अनुसार राजदूत रेले उक्त भेटमा थापाको चार दिने यात्राका क्रममा भारतीय विदेशमन्त्री सुष्मा स्वराज, प्रधानमन्त्री नरेन्द्र मोदीका राष्ट्रिय सूरक्षा सल्लाहकार अजित डोभल लगायतका अधिकारीहरुसँग भेट गर्दै नेपालमा लागेको नाकाबन्दी फुकाउन आग्रह गरेको जानकारी दिएका थिए ।
थापाको आग्रहप्रति भारतीय अधिकारीहरुले नेपालको नाकाबन्दीमा आफ्नो देशको कुनै हात नरहेको र आफूले नाकाबन्दी नगरेको जानकारी दिदै यसको नाममा नेपाल सरकारले भारत बिरुद्ध गरेको प्रचारवाजीबारे स्पष्ट पार्न भनेका थिए । भारतीय अधिकारीहरुले नेपालका प्रधानमन्त्री, उपप्रधानमन्त्री लगायत जिम्मेवार नेताहरु मधेस आन्दोलनका कारण बन्द रहेका सीमा नाका भारतले बन्द गयो भन्ने आरोपको प्रमाण दिनसमेत उपप्रधान तथा परराष्ट्रमन्त्री थापासँग माग गरेको जानकारी मधेसी नेतालाई रेले दिएको स्रोतले बतायो ।
मधेसी नेताहरुले संविधान निर्माणमा प्रमुख तीन दल नेपाली कांग्रेस, एमाले र एकीकृत माओवादीले गरेको उपेक्षा, संविधानमाथि कांग्रेसको तत्कालिन सरकारले ल्याएको संशोधन प्रस्ताव आन्दोलनरत पक्षसँगको सहमति बिनानै भएको जानकारी रेलाई दिएका थिए । आफुहरुलाई नेपालको नागरिकसम्म स्वीकार्न नसक्ने मधेस बिरोधी चरित्र बोकेका प्रधानमन्त्री केपी शर्मा ओलीको सरकारबाट अहिलेसम्म मधेस आन्दोलनका क्रममा ७० भन्दा बढी मधेसी शहीद हुन पुगेको, करिब एक हजार अंगभंग भएको जानकारी मोर्चाका नेताहरुले राजदूत रेलाई दिएका थिए ।
मधेस आन्दोलनको उपयुक्त विकल्पका रुपमा आफूहरुले राखेको ११ वुँंदे अवधारणा रहेको दाबी मधेसी नेताहरुले राजदूतसँग गरेका थिए । उपप्रधानमन्त्री तथा परराष्ट्रमन्त्रीको भारत भ्रमणका क्रममा नयाँ दिल्ली पुगेका राजदूत रेले थापाको चार दिने भारत भ्रमण समग्रमा सकारात्मक नभएको संकेत दिएको दावी स्रोतले ग¥यो । राजदूत रेले मधेसी नेताहरुले पनि भारत भ्रमण गर्नु पर्ने प्रस्ताव राखेका थिए । भारत सरकार मधेसी नेताहरुसँग मधेसमा जारी रहेको आन्दोलनका विविध पक्षमा वार्ता गर्न चाहेको जानकारी रेले दिएको स्रोतले बतायो । रुपरेखा साप्ताहीकबाट
nepalsandesh
