मोर्चासहित आन्दोलनरत्त संयुक्त युवा संघर्ष समितिलगायतका संघ संस्थाहरुको मंगलबार साँझ बसेको बैठकल राष्ट्रपतिको विरोध गर्ने निर्णय गरेको छ । बैठकले राष्ट्रपति भण्डारीलाई जनकपुर प्रवेशमै निषेधको निर्णय गरेको सदभावनाका जिल्ला अध्यक्ष संजयकुमार साहले बताए ।
विरोध कार्यक्रममा सहभागिताको लागी ग्रामीण ईलाकाहरुमा समेत सूचना गरिएको सद्भावना धनुषाका सिंहले जानकारी दिए । आन्दोलरत् युवाहरुले आजै साँझ राष्ट्रपति भण्डारीको पुत्ला समेत जलाएका छन् ।
मोर्चाका जिल्ला संयोजक एवं संघीय समाजवादी फोरम नेपाल धनुषाका अध्यक्ष शेषनारायण यादवले राष्ट्रपति भण्डारीको जनकपुर भ्रमणलाई विरोध गर्ने बताएका छन् ।
उनले भने-'मोर्चाले यसअघि नै १६ बुँदेमा हस्ताक्षर गर्ने दलका नेताहरुलाई जनकपुर आगमनमा रोक लगाएको छ । यो रोक उहाँको लागी पनि हो ।'
उद्योग वाणिज्य संघका अध्यक्ष शिवशंकर साह हीराले राष्ट्रपति जस्तो गरिमामय पदमा बसेर पनि मधेस आन्दोलन बारे नकारात्मक टिप्पणी गर्ने अनि नयाँ संविधानलाई विश्वकै उत्कृष्ट संविधान मान्ने व्यक्तिको आगमनलाई विरोध गर्ने बताए ।
सुरक्षा निकायका उच्च अधिकारी जनकपुरमा
राष्ट्रपति भण्डारीको भ्रमण व्यवस्थापनका लागि दिनभरजसो सुरक्षा निकायका उच्च अधिकारीहरुको बैठक यहाँ बसेको छ । मध्य क्षेत्रका क्षेत्रीय प्रशासक महेश प्रसाद दाहाल, प्रहरी नायव महानिरीक्षक(डिआईजी) देवेन्द्र सुवेदी, सशस्त्रका नायव प्रहरी महानिरीक्षक रामशरण पौडेल, सह-सचिव शंकर प्रसाद सुवेदी, साहायक रथी प्रदीपकुमार अधिकारी सहितका उच्च पदाधिकारीहरु जनकपुरमै छन् ।
प्रमुख जिल्ला अधिकारी कालीप्रसाद पराजुलीले आन्दोलनरत्त मोर्चाका जिल्ला स्तरीय नेताहरुसंग टेलीफोनमा तथा जनकपुर उद्योग वाणिज्य संघका अध्यक्ष शिवशंकर साह हीरालाई कार्यालयमै बोलाएर राष्ट्रपतिको भ्रमण कार्यक्रमलाई सहयोग गर्न आग्रह गरेका थिए ।
तर प्रमुख जिल्ला अधिकारी पराजुलीले राष्ट्रपतिको जनकपुर भ्रमण बारे आधिकारिक रुपमा केही बताउन चाहेनन् । कान्तिपुरसंगको टेलीफोन सम्पर्कमा उनले यतिमात्र भने-'छलफल हुँदैछ ।' राष्ट्रपतिका स्वकिय सचिव भेषराज अधिकारीले बुधबार भण्डारीको जनकपुर भ्रमण तयव भएको जानकारी दिएका छन् ।
स्रोतका अनुसार-राष्ट्रपति भण्डारी बुधवार अपरान्ह हेलीकप्टरबाट जनकपुर आउने कार्यक्रम छ । उनी जानकी मन्दिरमा दर्शन र पूजा पाठ गरेर फर्किने छन् ।kantipur.ekantipur
