आज बिहान नेपालवाणी रेडियो नेटवर्कमा पत्रकार ऋषि धमलासँग कुरा गर्दै सहअध्यक्ष त्रिपाठीले एक ट्याङ्करबाट दश लाखसम्म बढी पैसा लिएर कालोबजारीमा तेल बिक्री हुने गरेको बताउनुभयो । ‘तेलमा गरेको कालोबजारीको पैसा बालुवाटारसम्म पुग्ने गरेको छ’, उहाँले भन्नुभयो, ‘एक ट्याङ्कर तेल ब्ल्याकमा बेचेर दश लाखसम्म कमिशन लिएको प्रमाण मैले पाएको छु ।’
सहअध्यक्ष त्रिपाठीले तेलमा भएको कालोबजारीमा नेपाल आयल निगमका कर्मचारीदेखि राजनीतिक दलका नेताहरुसम्मको मिलोमतो रहेको आरोप लगाउनुभयो ।
‘भारतबाट दैनिक रुपमा उल्लेख्य इन्धन आइरहेको छ’, उहाँले भन्नुभयो, ‘तपाईहरु आफै पनि नेपाल आएका ट्याङ्कर र ग्यासको बुलेट गनेर हिसाव गर्नुस्, ती इन्धन कहाँ वितरण गरिएको छ । आफै थाहा पाइहाल्नु हुन्छ ।’
आयल निगमका कर्मचारीहरु केही तस्करहरुसँग मिलेर नाकाबन्दीको फाइदा उठाएर करोडौ कमाउने उद्देश्यका साथ सक्रिय भएको उहाँले बताउनुभयो । ‘नेपालभित्र तेल र ग्यास छ र त ब्ल्याकमा पाइन्छ’, त्रिपाठीले प्रश्न गर्दै भन्नुभयो, ‘अभाव हुन्थ्यो भने कसरी पाइन्छ ब्ल्याकमा तेल र ग्यास ।’
‘एक ट्याङकरमा दश लाख रुपियाँसम्म बढी रकम लिइन्छ । त्यो पैसा बालुवाटारसम्म पुग्छ पैसा’, सहअध्यक्ष त्रिपाठीले भन्नुभयो, ‘यो पैसा नेताहरुलाई पनि बाडिँन्छ । तस्करी गर्न नेताहरुलाई नाका बाँडफाँट गरिएको छ ।’
सरकारले अन्तर्राष्ट्रिय समुदायलाई देखाउन आफूसँग भएको इन्धन वितरण नगरेर दाउरा बिक्री थालेको उहाँले आरोप लगाउनुभयो । सरकारले आफ्नो असक्षमता लुकाउन दाउरा बिक्री गर्न पुगेको त्रिपाठीले उल्लेख गर्नुभयो ।
नेपाल आयल निगमले भारतबाट भित्रिरहेको इन्धन पहुँचवालाहरुलाई मात्रै उपलब्ध गराउने गरेको सर्वसाधारणको आरोप छ ।
भारतीय नाकाबाट भित्रिएका इन्धन बोकेका ट्याङ्कर र ग्यासका बुलेटको सही वितरण प्रणालीमार्फत दिने हो भने अहिले देखिएको समस्या आधाभन्दा बढी कम भएर जाने जानकारहरुको भनाइ छ ।
dainiknepal भिडियो हेर्न तलको बाकस थिच्नुहोस
